क्रिकेटवर चित्रपट नकोसा....
आयपीएल असो वा वनडे सामने क्रिकेट म्हणजे भारतीयांचा जीव की प्राण. मात्र क्रिकेटवर आधारित चित्रपटांची बॉक्स आॅफिसवरची टक्केवारी फारशी बरी नाही. मास्टरब्लास्टर सचिन तेंडुलकर यांच्यावर डॉक्युड्रामा असल्याने अर्थातच त्याबाबत उत्सुकता आहे. तसेच 'धोनी... चा टीझर आल्यापासून इंडस्ट्रीत ब-यापैकी सकारात्मक चर्चा आहे. मात्र आजची सिने परिस्थिती बघता चित्रपटात क्रिकेट असो वा नसो चांगला आशय असणे खूप गरजेचे आहे. क्रिकेट हा तमाम भारतीयांच्या जिव्हाळ्याचा विषय असल्याने दिग्दर्शकांच्या दृष्टीने हे सिनेमे बनवणे आणखी अवघड असते.
भारतात मनोरंजनाची दोन मुख्य साधने म्हणजे चित्रपट आणि क्रिकेट मात्र बॉक्स आॅफिसवरची आकडेवारी बघता मोठ्या पडद्यावर जेव्हा जेव्हा क्रिकेट दाखवण्याचा प्रयत्न झाला तेव्हा तेव्हा प्रेक्षकांनी त्यांकडे पाठ फिरवली आहे. हॉकी, बॉक्सिंग, अथलेटिक्स या सगळ्या इतर खेळांवरील हिंदी चित्रपटांनी चांगला गल्ला कमावला असून क्रिकेटच्या पदरी मात्र कायमच निराशाच आल्याचे चित्र आजवर दिसून आलेत. क्रिकेटवर आधारित 'पटियाला हाऊस', 'दिल बोले हडीप्पा','फेरारी की सवारी','चैन कुली की मैन कुली' हे सर्व चित्रपटही गल्ला जमवण्यात अपयशी ठरले आणि बॉक्स आॅफिसवर जादू दाखवण्यात साफ कमी पडले. क्रिकेटवर बेतलेल्या यशस्वी चित्रपटांमध्ये आमिर खानचा 'लगान' हा ऎकमेव असा उल्लेख करता येईल. यामागेसुध्दा क्रिकेट वजा देशप्रेम अशी भावना असल्याने यशस्वी ठरला. तसेच श्रेयस तळपदेच्या 'इक्बाल' या छोट्या बजेटच्या सिनेमाने समीक्षकांसह प्रक्षकांची दाद मिळवली. पण असे झालेले हे पहिले आणि शेवटचे उदाहरण म्हणता येईल.
क्रिकेटपटू स्टार असले तरी आजवर त्यांच्या भूमिका वठवण्यासाठी बॉलिवूडमधले कुठलेच स्टार पुढे आले नाहीत 'अजहर' मध्ये इम्रान हाश्मीने मोहम्मद अझरुद्दीनच्या भूमिकेत दिसला पण हा चित्रपट देखील बॉक्स आॅफिसवर जादू दाखवण्यात अपयशी ठरला. आता सर्व लक्ष यावर्षातच प्रदर्शित होणा-या 'एम एस धोनी...' कडे असणार आहे. कारण महेंद्रसिंग धोनीच्या भूमिकेत सुशांत सिंग राजपूत असणार आहे.
टिप्पण्या